Cascadu Love Affair
Harry says he’ll die,
If Leela (who really likes him)
doh sen’ him some cascadu
Doux-doux, leh meh try yuh han’
Salt fish cook-up wid nice, steam yam
And if yuh want meh stay fuh true
Then ah want yuh make some cascadu
Curry it sweet or stew it nice
Dat goin’ good wid bagee rice
O gosh, gyul, ah tastin’ plantain too
Ah feelin’ fuh a cascadu
Yuh could steam it up wid melongene
And pepper it wid some bird cayenne
Make de ting however yuh choose
Dis fellar lookin’ fuh cascadu
Yuh could fry de fish in a big coal pot
And make sure it servin’ hot, hot, hot
Yuh could colour it up wid some red roucou
Gyul fix meh up wid cascadu
Yuh know ah done gone quite Canada
It does make cold like hell in November
So me eh care if you is warahoon
Ah beggin’ yuh, woman … cascadu!
Dis place have all meh pores raise up
I lookin’ like how when chicken does pluck
It doh matter if ah wear ten socks and shoes
Lawd, Fadder hear meh! … cascadu!
Ah have one sweet job up in Toronto
An’ meh wife dey she eh want me to go
She does put plenty stay-home in meh food
O Lad! Meh only hope is cascadu!
Boss-man an’ all eh’ want me leave
He fixin’ meh papers for permanency
Meh head so hot, me eh know what to do!
Ah beggin! Sen’ meh some cascadu!
Ah doh want to be in no cold, cold town
Ah feelin’ to be Trinbago bound
But ah ‘fraid meh visa get renew
O Gawd gyul … cascadu!
I like yuh doux-doux, I like yuh bad
So even if is jus’ wid green salad
I dyin’ to come back home fuh true!
Lawd! Ah beggin! … cascadu!
I like yuh! Doh feel is mamaguy
When I see yuh ah only givin’ sweet eye
So cook up some fish wid nice coo-coo
Meh mine only stick on cascadu
Mail it by some express route
‘Else ah go freeze gyul! … cascadu!